主页 > 通讯电子 >【18区扫食】$3X日台菜+镬气碟头饭! 和宜合道平民饭堂 >

【18区扫食】$3X日台菜+镬气碟头饭! 和宜合道平民饭堂

2020-06-11

和宜合道熟食市场，可谓係葵涌嘅隐世食堂，唔係地胆都唔会识嚟。呢个熟食市场圆凼凼，有点似新加坡的 Food court，核心嘅内围是座位，核心嘅外围是食肆，菜色选择多样化，由日本菜、台式料理到大排档、印度菜，甚至素食同传统糕点都一应俱全。除了印度菜和素食，其他三十几蚊已有交易，仲要包饮品。提提大家呢度好多餐厅星期日都唔做晚市，唔好摸门钉！

撰文、摄影:很想很想食玩训

早几年和宜合道发生大火，不过而家已经翻新好。

入面圆凼凼，核心内围係座位。

廿几蚊个餐配台式饮品

一开始以为呢间店係食日本野，坐低先知原来係日、台、越式乜都有啲。呢度嘅餐包埋一杯台式饮品都只係$26，平得黎唔会hea你底，CP值超高，可谓穷人恩物。而老闆最拿手嘅竟然係传统糕点猪笼饼，不过就要预定先有得食，2盒起订。

盐酥鸡饭餐$26(跟台式饮品) 盐酥鸡炸到好酥脆香口，外脆肉软。肉燥裏面有煮到绵嘅肥猪肉粒粒，入口即化，为肉燥饭加左唔少分。$26仲要包一杯台式饮品，抵到烂啦！大食嘅朋友仲可以免费加饭。

芋头珍珠雪香$12 一饮落去成个口充满浓浓香芋味，奶味都好浓郁，互相挥映。成杯都好rich!好正！

猪软骨拉麵$20 猪软骨係老闆自家炆嘅，有大约6块，肉味几香浓但软骨唔腍，係碎硬质地，唔太啱追求入口即化啫喱状猪软骨嘅小编。之但係成碗面铺满晒餸先卖$20，真係去边度搵！？好过自己煮啦！

鱼露鸡翼老火猪骨汤米线餐$26（跟台式饮品) 鸡翼用鱼露腌完再炸，外脆内嫩，由于用左鱼露，所以特别有咸香味。米綫偏幼，食落口顺滑弹牙，汤底加左黑白芝麻，麻油，葱花及炸蒜增添香气。

芝麻珍珠奶茶$12 珍珠好烟韧有咬口，而且日日新鲜整，绝不留过夜。芝麻係老闆自家炒完再磨，所以比较粗身，咬落好香芝麻味。味道微甜同时仍能饮出茶味。

瀛珍栈美食

地址:葵涌和宜合道24号和宜合道熟食市场C12号舖(显示地图)

电话：3113 4949/9630 6881

营业时间：11am-8pm

妈妈的味道温馨日本家庭料理

温馨家庭日本料理店，老闆一脚踢，上菜时间会耐少少，所以最好早半个钟打去落order定先。日韩料理都有，菜色都好有家庭风味，好似食紧日本妈妈煮俾仔女嘅料理咁。老闆不时会同客人倾计，了解下食物质素。晚市时段都几旺场，坐无虚席。店里面仲有一只看门口嘅猫猫。

韩式牛肉荞麦冷面$35 荞麦冷麵爽口，牛肉好腍同入味，而且有炒香咗既洋葱，食落唔辣反而甜甜地，好开胃。另外仲有青瓜丝，腌萝蔔丝同红萝蔔丝，成个感觉好清新。个汁比较重口味，点果阵唔好太重手。

柚子蜜照烧鸡肉饭$30 味道有啲似柚子蜜版既西柠鸡，不过冇西柠鸡咁甜，入口唔腻，入面配有芽菜。

日式什菜薯饼$28 外表炸得好靓，金黄嘅外皮包着软滑嘅薯蓉，混合粟米粒同萝蔔粒，口感不俗，味道较为清淡。

日式牛乳咖啡(前)$12 、冻椰汁薏米水 $20 饮落咖啡味几香，但苦味唔重。饮完口腔会留低一阵牛奶味，同平时饮既咖啡好唔同。冻椰汁薏米水椰汁好浓郁，裏面仲有好多薏米粒，甜甜哋，有得咬下都几特别。

懒洋洋嘅猫~~

山本

地址:葵涌和宜合道24号和宜合道熟食市场C11号舖(显示地图)

电话:6671 9115

营业时间:星期一至六11am-9pm，星期四至五11am-3pm，星期日休息

大排档风味有镬气碟头饭

呢间餐厅主打大排档质素碟头饭，焗得香，炒得猛。碟碟都风味爆灯，绝不欺场，用料十分足、上菜快，重点是价钱平，$32包饮品，如果小编住呢头或在附近返工，应该会成日走落黎食!

焗猪扒饭$38(跟餐饮) 一坐低老闆就推介呢个焗猪扒饭。饭面嘅猪扒同芝士有小小焦係上面，卖相十分吸引，睇见都流晒口水!炒底饭香口得黎多汁，一啲都唔乾，食到停唔到口!!好有惊喜!猪扒就非常幼嫰多汁，$38抵食到爆。

西柠班块饭$32 (跟餐饮) 炸鱼柳外脆内里软绵绵，好嫩口! 加上西柠汁好醒胃，有别于平时比较浓稠嘅西柠鸡汁底，令到炸鱼柳能保持脆身。

梅菜炆腩仔饭餐$32 (跟餐饮) 腩肉好入味，瘦肉都唔会好老，肥肉更肥而不腻，成件事好惹味，送饭一流，物超所值呀!

虾酱通菜牛肉饭$32 (跟餐饮) 牛肉同菜既分量有得比，而且非常够镬气，有大排档水準。通菜快炒唔会太老，牛肉都好嫩身。虾酱味好香，亦唔会太鹹，控制得恰到好处。

祥和

地址:葵涌和宜合道24号和宜合道熟食市场C13号舖(显示地图)

电话:2264 3823

营业时间:11am-9pm

印度人煮印度菜价钱不平练英语

佔唔到呢度都有咁正宗的印度餐厅，老闆、大厨和店员都唔识讲广东话，所以要用英文沟通～不过又唔洗惊嘅，餐牌係中英对照，你净係识up英文数字就得喇。店内外有四至五张枱，虽然唔多，但都算鬆动，坐得几舒服，价钱有D贵。

蒜茸烤饼$20 蒜茸味几出，饼嘅质地烟烟韧韧，而且略带甜味。上枱时热辣辣，叫多个咖哩点嚟食仲正!

牛油咖哩鸡$59 鸡肉非常嫰而且腍，咖喱质地浓厚，椰汁味浓，食落甜味较重，有微微辣味，适合唔食辣嘅你。仲可以用烤饼点汁食!!

烩菠菜芝士$56 菠菜蓉牛油味好浓好好味，而且有洋葱同蒜片，好香口。入面既芝士叫Indian Cottage Cheese，老闆话係印度好出名，但食落芝士味唔太出，质感就好特别，好似肉丸，食多几旧都唔会腻。

就係呢只Indian Cottage Cheese~

印度黄饭$32 用比较幼长而且乾身嘅正宗印度米，嗰饭入面有啲果仁增加口感，不过略嫌太乾身。

香辣鬆化胡椒饼$16 成块都好脆口，係胡椒饼上面加生蒜蓉、芫茜、青瓜、椰菜及红椒，感觉都几醒胃，不过好快通风，要食得快，唔好摆太耐啊。

芒果乳酪$25 可能因为用左原味乳酪，所以乳酪味同芒果味都偏淡，味道普通，卖$25，有啲贵！

印度香料茶$18 同茶餐厅奶茶唔同既係…佢真係有香料味! 不过入口薄身，水感较重，茶味亦唔太浓。

胡椒饼晚市送既，味道偏鹹，附清新味道嘅青酱。

咖哩烤肉和印度餐厅

地址:葵涌和宜合道24号和宜合道熟食市场C9号舖(显示地图)

电话:9151 8436

营业时间:11:30am-10pm

台式自助素食红饭靓汤任装

呢间店午餐时段推出素食自助餐，一盘盘嘅素食一次过晒冷show晒出嚟，有成十几款。想食几多就夹几多，夹完就成碟放上磅上面秤，磅会自动减走碟嘅重量，素食每100g $14，秤完几钱之后先再加餸汁，十分均真。拣好餸之后就有红米饭和两款是日老火汤任添。老闆一家全都食素，特意仿效台湾素菜店的自助形式，希望能推广素食，下星期仲会卖埋鲜榨果汁。